- अविरत वाटचाल न्यूज नेटवर्क
- मुंबई, 29 नोव्हेंबर 2023:
राज्य विधिमंडळाचे हिवाळी अधिवेशन नागपूर येथे ७ डिसेंबर ते २० डिसेंबर २०२३ या कालावधीत होणार आहे. विधानभवन येथे आज विधानसभा आणि विधानपरिषद कामकाज सल्लागार समितीची बैठक झाली. यावेळी नागपूर येथे होणाऱ्या अधिवेशनाच्या कामकाजाबाबत चर्चा झाली.
या बैठकीला विधानसभा अध्यक्ष ॲड. राहुल नार्वेकर, विधान परिषद उपसभापती डॉ. नीलम गोऱ्हे, विधानसभा उपाध्यक्ष नरहरी झिरवळ, मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, संसदीय कार्य मंत्री चंद्रकांत पाटील, विधानसभेचे विरोधी पक्षनेते विजय वडेट्टीवार, विविध विभागाचे मंत्री, दोन्ही सभागृहाचे सदस्य, विधिमंडळाचे सचिव जितेंद्र भोळे आदि उपस्थित होते.
हिवाळी अधिवेशन गुरुवार ७ डिसेंबर २०२३ ते बुधवार २० डिसेंबर २०२३ या कालावधीत घेणार आहे. हिवाळी अधिवेशनाचे एकूण दिवस १४ असून, यामध्ये प्रत्यक्ष कामकाज १० दिवस, तर सुट्या (शनिवार व रविवार मिळून) ४ दिवस आहेत.
सरकार गंभीर नाही- वडेट्टीवार
दरम्यान हे अधिवेशन 3 आठवड्यांचे घ्यायला हवे होते. सरकारला चर्चा करायची नाही तर केवळ टाईमपास करायचा आहे. सरकारने 3 आठवड्यांच्या अधिवेशनाऐवजी 2 आठवड्यांचे अधिवेशन घेतले आहे. अधिवेशनाबाबत सरकार गंभीर नसल्याची टिका विधानसभा विरोधीपक्ष नेते विजय वडेट्टीवार यांनी केली.
—————————————————————————————
