- अविरत वाटचाल न्यूज नेटवर्क
- मुंबई, 23 ऑगस्ट, 2023
महाराष्ट्र विधानमंडळाच्या दोन्ही सभागृहांच्या सदस्यांसाठी 24 ऑगस्ट ते 4 सप्टेंबर या कालावधीत 3 युरोपीय देशांच्या अभ्यासदौऱ्याचे आयोजन करण्यात आले आहे. या अभ्यासदौऱ्यात 22 सदस्य सहभागी झाले असून 6 अभ्यासभेटी, बैठका होणार आहेत. या परदेश अभ्यासदौऱ्याला परराष्ट्र व्यवहार मंत्रालय, भारत सरकार, यांची मान्यता (Political Clearance) प्राप्त झाली आहे. अभ्यासदौऱ्यावरील शिष्टमंडळाचे नेतृत्व विधानपरिषदेच्या उपसभापती डॉ.नीलम गोऱ्हे करणार आहेत.
फ्रॅंन्कफर्ट (जर्मनी), ॲमस्टरडॅम (नेदरलँड) आणि लंडन (यु.के.) या शहरांना अभ्यासदौऱ्यावरील सन्माननीय सदस्यांचे शिष्टमंडळ भेट देईल. एकुण 22 सन्माननीय सदस्यांमध्ये निम्म्या संख्येने म्हणजे 11 महिला सन्माननीय सदस्या या शिष्टमंडळात सहभागी झाल्या आहेत, अशी माहिती गोऱ्हे यांनी दिली.
अभ्यासदौऱ्यात प्रारंभी फ्रॅंन्कफर्ट येथे सामाजिक, सांस्कृतिक तसेच कृषी आणि दुग्धउत्पादन क्षेत्रातील तज्ञांबरोबर तसेच भारताचे उच्चायुक्त यांच्यासमवेत बैठक होईल. त्याचप्रमाणे जर्मनीत स्त्री-पुरुष समानतेसाठी कार्य करणाऱ्या अभ्यासगटाबरोबर चर्चा-संवाद आयोजित करण्यात आला आहे.
ॲमस्टरडॅम येथे देखील नेदरलॅंडच्या विविध क्षेत्रातील तज्ञांबरोबर तसेच संयुक्त राष्ट्र महिला आणि हक्क समानता विचारमंच (UN Women And Gender Equality Forum) सदस्यांसोबत अभ्यासभेट, चर्चा आयोजित करण्यात आली आहे. यावेळी भारताचे नेदरलॅंडमधील राजदूत यांचीही अभ्यासभेटीवरील सन्माननीय सदस्य भेट घेतील. त्याचप्रमाणे लंडन येथे देखील भारताचे लंडनमधील उच्चायुक्त, संयुक्त राष्ट्र महिला आणि हक्क समानता विचारमंच, लंडन, (UN Women Orgnisation And Gender Equality Forum in United Kingdom), लंडनमधील मराठी मंडळाचे पदाधिकारी, यु.के. पार्लमेंट मधील राष्ट्रकुल संसदीय मंडळ मुख्यालय आणि महासचिव (Secretary-General, CPA Headquarters) यांच्या समवेत देखील अभ्यासभेट आयोजित करण्यात आली आहे.
========================================================
========================================================
