पनवेल, मालेगाव, भिवंडी महापालिकांसाठी 24 मे रोजी मतदान
नवी मुंबई, 19 एप्रिल 2017/ AV News:
राज्यातल्या तीन महापालिकांच्या निवडणुकांचे बिगुल वाजले असून या महापालिकांसाठी मे महिन्यात मतदान होणार आहे. येत्या 24 मे रोजी मतदान आणि 26 मे रोजी मतमोजणी होणार असल्याची माहिती राज्याचे मुख्य निवडणुक आयुक्त जे. एस. सहारिया यांनी आज मुंबईत पत्रकार परिषदेत दिली.
या तीनही महापालिकांसाठी 29 एप्रिल ते 6 मे या कालावधीत अर्ज दाखल करता येणार आहेत. 8 मे रोजी अर्जांचा छाननी होणार आहे. 12 मे रोजी चिन्ह वाटप होणार आहे.
पनवेल नगरपरिषदेचे 1 ऑक्टोबर 2016 रोजी पनवेल नगर परिषदेचे महापालिकेत रूपांतर करण्यात आले. नव्यानेच अस्तित्वात आलेल्या या महापालिकेचे महापौरपद अनुसूचित जातीतील महिलेला मिळणार आहे. पनवेल महापलिकेच्या 78 जागांसाठी ही निवडणूक होणार आहे. भिवंडी महापालिकेत 90 जागा तर मालेगाव महापालिकेत 84 जागा आहेत.
